
وبعد 13 شهر بالتمام والكمال وعليهم يوم زيادة خير أخيراً الحمد لله خلصت جيش ... 13 شهر مرت بطيئة جداً ومحستش انها عدت بسرعة إلا في الآخر ، اكتشفت فجأة انها عدت بسرعة جداً .
يوم 25-11-2008 وبعد سنة كاملة من انتظار يوم النهارده ده ، بتحس ان ده اهم يوم في تاريخك كبني آدم ، التاريخ اللي مش هتقدر تنساه بعد كده ، لا عيد ميلادك ولا يوم تخرجك ولا غالباً يوم جوازك - أو حسب الظروف محدش عارف
- ولا اي يوم في حياتك ، هو اليوم ده الوحيد اللي بيبقى عندك استعداد تقعد تستناه 13 شهر وكل يوم يعدي يقربك منه بتبقى مبسوط أكتر .
أيام عدت متبقاش منها إلا الذكريات ، كانت ذكريات وحشة بس بعد ما خلصت اكتشفت لأول مرة إنه ممكن يبقى فيها ذكريات حلوة ، اتعلمت حاجات كتيرة رغم اني كنت متخيل إني مش هتعلم حاجة من الجيش ، الشيء الوحش إني حاسس إن ال 13 شهر دول غيروا فيا حاجات كتير ، يمكن متعبتش كتير لإني تقريباً بعد اول شهرين تلاتة بقيت عايش في جيش ملاهي زي ما بيقولوا
، بس نفسياً الفترة دي أثرت علينا كلنا جامد .
مش عارف انا حاسس بإيه ، صراحة مش فاهم نفسي ومش فرحان ولا أكيد زعلان ، بس حاسس بحالة ازبهلال شوية ، الحمد لله .
تقريباً من النهارده اقدر انسى شوية مصطلحات كنت بصبح وأنام وانا بسمعها ، حتى كنت بشوفها في الحلم ، ألوان معينة في اللبس مش هشوفها تاني ، مش هقول افندااااام لحد خالص علشان اتعقدت منها 
دلوقتي باقي لحد يوم 1-12 الجاي علشان آخد الشهادة ، اللي هي أهم من الثانوية العامة ومن شهادة الكلية ومن اي شهادة تاني ، ورغم كل ده ، لو حد جه سألني لو الزمن رجع لورا وكان دخول الجيش باختيارك كنت هتختار ايه ؟ بصراحة حاسس ان ده فعلاً كان الخير ليا رغم انه اللي باين للناس كلها عكس كده ، الحمد لله .
في الآخر والله الجيش ده عرفني على ناس كتيرة أوي ، وقربني من ناس كنت بعيد عنها ، على راسهم بحسب ترتيب الأقدمية العسكرية
جندي مجند سابق أحمد عماد ، رغم اني مكنتش محتاج اقرب منه أكتر من بعد معسكر المقطم الشهير ، بس كان من الناس اللي هونت على الواحد فترة البداية ومركز التدريب وأول يوم طلبة ميز
محمد دسوقي واحد من عساكر قليلة ربنا كرمهم معايا وقضينا مركزين تدريب مش مركز واحد رغم ان كل الناس مش عارفة دسوقي دخل الجيش ازاي
، رامي محروس وقعدة آخر الليل لما كنا نبقى اتنين ولا تلاتة بس ونشتري كرتونة شيبسي 24 كيس واربع علب تونة وخمس علب جنبة مثلثات على اربع علب فيتا ، وكانت بتخلص والله بفضل ربنا وبمعونة الوحش التالت كريم ، كريم مكانش بس كان صديقنا الصدوق في الأكل إنما قويسنا كلها تعرف كريم ومش هينفع نقول ليه علشان احنا في بلوج هنا مش في وحدة
جندي مجند تامر اللي اشتغل في تلات اسلحة وتاني أكتر بني آدم على مدار التاريخ يآكل تونة في مركز تدريبه
خالد عيسوي ربنا يسامحه هو وأخوه مش كانوا خدوا أحمد وطلعوا خالد ، ولا هي مفرقتش ما أحمد دخل جيش في بس جيش ملكي ، وبقية الناس اللي قضت معايا جيش ، طبعاً ابن خالتي راجل عشرة على عشرة لإنه لما جه معايا في الجيش ابتديت اقدر ازوغ براحتي مش علشان أي حاجة تاني طبعاً 
وأخيراً الحمد لله على كل شيء ، وأتمنى إن المرحلة دي تكون فادتني وفرقت معايا .
الحمد لله رب العالمين .
posted by Ahmed Gamal @ 5:47 PM,

5 Comments:
-
At November 25, 2008 at 10:31 PM,
khaled adel said...
-
مبروك يا جمال
الحمد لله ايام وعدت بحلوها ومرها
وربنا يصبر كل اللي لسة مخرجوش
-
At November 25, 2008 at 10:49 PM,
Mohamed Gamal El-Din said...
-
Mabrook ya Fata :D
-
At November 26, 2008 at 7:42 AM,
أحمد عماد said...
-
مبروك يا كبير
وكويس انك بتراعي الأقدمية ابقى فكرني اصرفلك يومين سجن
فعلا انا زيك بالظبط لا فرحان ولا زعلان حاسس اني زي مكون تايه شارب حاجة مش فايق وحاسس كاني في حلم
عموما انسى زمن الخطوة المعتادة واديها حتة خطوة تنظيم علشان الي جاي أكيد أصعب
-
At November 27, 2008 at 9:56 AM,
Aboud said...
-
alf alf mabrook ya gaamal 3la nehyet el gesh we isA el ayam ely gayah tekon a7sen bekteeer
-
At May 1, 2009 at 3:27 AM,
najahaja said...
-
السلام عليكم ورحمه الله وبركاته
احنا اكيد منعرفش بعض بس جايز اللي يربطنا ان احنا دخلنا جيش سوا بس انا لسه مخلصتش بس قربت والحمد لله
المهم انا لسه شايف الكتاب بتاع دوت نت 2008
وانا مخلص تجاره وليه كنت في البرمجه شويه بس مش عارف لسه فاكر ولا لأ
المهم ما علينا ياريت لما تقرا التعليق ده تضيفني على الماسنجر
علشان انا عايز ابقى استفسر عن شويه حاجات جايز تكون معروفه للكل بس السنه اللي قربت تخلص دي نستني حاجات كتير قوي
home_9999@hotmail.com
انا اسمي محمد ومن اسيوط ومخلص تجاره
<< Home